DAAWO:- Ciidanka Hirshabeelle oo soo badbaadiyay Hub culus oo Shabaab kala baxsadeen AMISOM

Madaxda ugu sareysa maamul Goboleedka Hirshabeelle ayaa Ciidamada Midowga Africa ee AMISOM ku wareejiyay Hub ay ku soo badbaadiyeen weerar dhabgal ah oo loo dhigay Kolonyo ka tirsan Ciidamada AMISOM oo saad u siday Ciidamada AMISOM ee ku sugan degmada Balcad ee Gobolka Shabeellaha dhexe.

Munaasabad lagu qabtay maanta Madaxtooyada dowlad goboleedka Hirshabelle ayuu Madaxweynaha dowlad goboleedka Hirshabelle Maxamed Cabdi Waare u mahadceliyay qaar kamid ah ciidamada dowlad goboleedka Hirshabelle oo gurmad u fidiyay ciidamo ka tirsan AMISOM oo jimcihii aynu ka soo gudubnay lagu weeraray duleedka degmada Balcad.

Madaxweyne Waare ayaa sheegay in ciidamada gurmadka fidiyay ay ahaayeen kuwo muujiyay geesinimo isla markaana maamulka uu abaalmarinayo.

“Sharafta iyo geesinimada aad muujiseen kuwii gurmaday iyo kuwii taakuleeyay intaba waa mid muujineysa Wadaninimo iyo Soomaalinimo.”ayuu yiri Madaxweyne Waare oo ka hadlayay munaasabad lagu wareejinayay hub ay ciidamada dowlada federalka ka soo badbaadiyeen weerar ay ku qaadeen kolonyo saad u sidey ciidamada AMISOM duleedka magaalada Balcad ee gobolka Sh/dhexe.

Munaasabadan ayaa waxaa ka hadlay taliyaha ciidamada booliska Hirshabelle Cornel Xasan Dhicisow waxana uu sheegay in gurmad ay sameeyeen ciidamada booliska iyo kuwa Milatarigaba ay ka soo qabteen maleeshiyaadka Al-Shabaab.

“Waxaan ugu tagnay iyadoo ciidamadii Alshabaab ay joogaan goobtii dagaalku ka dhacay,waxaan ka soo badbaadinay qaar ka mid ah qoryihii ku xirnaa hubka ay AMISOM wateen,ciidamo go’odoomay”ayuu yiri taliye Xasan Dhicisow.

Munaasabadan ayaa lagu wareejiyay saraakiil ka socotay ciidamada AMISOM labo qori oo noocoodu yahay Dhashiike oo laga soo furay gaadiid tikniko ah oo lagu gubay duleedka Balcad, waxana ay saraakiisha ciidamada AMISOM u mahadceliyeen ciidamada dowlad goboleedka Hirshabelle.

“Waxaan halkan aan u joogaa in aan dib ula wareegno hub lagu soo qabtay howlgal ay sameeyeen walaalaheena.”ayuu yiri sarkaalka u sareeya ciidamada AMISOM ee ka howlgala dowlad goboleedka Hirshabelle.

“Tan waxa ay cadeyn u tahay in aan iskaashanayno oo aan si wadajir ah oo walaatinimo leh aad inoola shaqeyneysaan.”ayuu sii raaciyay sarkaalkan.

Ciidamada Al-Shabaab ayaa weerar xoogan jimcihii la soo dhaafay ku qaaday Ciidamada AMISOM ee ku sugan degmada Balcad ee Gobolka Shabeellaha dhexe.


Fikradaha Akhristayaasha (0)




ADVERTISEMENT